28 Ноябрь, 2020

Муроҷиатномаи Вакилони Анҷумани  ХХII Федератсияи иттифоқҳои касабаи мустақили Тоҷикистон ба роҳбарони ташкилот, мақомоти иттифоқҳои касаба ва аъзоёни иттифоқи  касабаи Тоҷикистон.

     Мо вакилони Анҷумани  ХХII Федератсияи иттифоқҳои касабаи мустақили Тоҷикистон изҳор менамоем, ки иштироки бевоситаи Иттифоқҳои касаба дар маъракаи интихоботӣ, пешбарии номзад ба мансаби Президенти Ҷумҳурии Тоҷикистон қисми таркибии низоми ҳуқуқӣ ва сиёсии ҷомеаи Тоҷикистонро инкишоф дода, робитаҳоро бо оммаи меҳнаткашон тақвият бахшида, барои боз ҳам амиқтар фаҳмидани умеду орзу, дархосту пешниҳодҳои меҳнаткашон  шароити  мусоид фароҳам меорад.

         Маъракаи пешазинтихоботии навбатии Президенти Ҷумҳурии Тоҷикистон дар шароити муътадили ҷамъиятию сиёсӣ мегузарад.

        Дар даврони Истиқлолияти давлатӣ бо иштироки фаъолонаи ҳизбҳои сиёсӣ ва ташкилотҳои ҷамъиятӣ фазои сиёсии Ҷумҳурии Тоҷикистон  устувор гардида, сулҳу оромӣ, ваҳдату якдигарфаҳмӣ таҳким ёфта, некӯаҳволии мардум рӯ ба беҳбудӣ ниҳодааст. Теъдоди зиёди корхонаҳои истеҳсолӣ, иншоотҳои иҷтимоӣ бунёд гардида, робитаҳои, сиёсӣ,  иқтисодию тиҷоратӣ, фарҳангӣ  ва байналмилалии ҷумҳурӣ ҳарчӣ бештар вусъат меёбанд.

       Аксарияти муваффақиятҳои ба дастомадаи соҳаҳои гуногуни кишвар ба фаъолият, ташаббус, қобилияти бунёдкорӣ, матонату ҷасорат ва сиёсати хирадмандонаи пешгирифтаи Пешвои муаззами миллат, Президенти Ҷумҳурии Тоҷикистон муҳтарам Эмомалӣ Раҳмон дар роҳи пешрафт ва рушди Тоҷикистон бевосита алоқамандӣ дорад.

        Дар таърихи фаъолияти Иттифоқҳои касабаи Тоҷикистон санаи 24 октябри соли 2019 бори аввал баргузор гардидани вохӯрии роҳбарияти Олии сиёсии мамлакат бо намояндагони иттифоқҳои касабаи кишвар нишонаи тавваҷуҳ, қадршиносӣ ва эҳтироми Пешвои муаззами миллат нисбат ба аҳли заҳмат арзёбӣ мегардад.

       Иттифоқҳои касабаи Тоҷикистон    дар байни  аъзоёни худ  мунтазам оид ба  сиёсати дурбинона ва муваффақонаи Пешвои миллат дар пешрафт ва  шукуфоии Ватани азиз  корҳои фаҳмонидадиҳиро дар сатҳи зарурӣ ба роҳ  мондааст.    

       Ҳангоми иштирок дар чорабиниҳои сатҳи минтақавӣ ва байналмилалӣ, ки ба самти ҳаракатҳои иттифоқҳои касаба вобастагӣ доранд, бо сари баланду рӯйи сурх аз сулҳу Ваҳдати комил, ободиву пешрафти  Ватан бо ифтихор ҳарф мезанем, ниҳодҳои байналмилалиро  ба ҳамкории дуҷониба даъват менамоем ва бо Тоҷикистони соҳибистиқлолу Пешвои миллати раъиятпарвараш  ифтихор  менамоем.

       Ҳар яки мо аъзои иттифоқҳои касабаи Тоҷикистон  заҳматҳои ҳаррӯзаи Пешвои муаззами миллатро дар роҳи сулҳу субот, ваҳдату ҳамдилӣ, созандагию бунёдкорӣ эҳсос мекунем ва ҳамеша гиромӣ медорем.       

        Паёму вохӯриҳо, таҳия ва қабули санадҳои меъёрию ҳуқуқии моҳияти иҷтимоидошта, иқдомҳои созандаю бунёдкорона ва амалҳои пайвастаи Сарвари давлат бори дигар мардумро эътиқодманд гардонид, ки Тоҷикистон давлати иҷтимоӣ буда, таъмини зиндагии шоиста барои шаҳрвандони кишвар ва ғамхории ҳамешагӣ нисбат ба ҳар як фарди ҷомеа дар маркази таваҷҷуҳи Пешвои миллат қарор хоҳанд дошт.

Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон нисбат ба масъалаҳои худшиносии миллӣ, пос доштани арзишҳои Ваҳдати миллӣ, пешгирии шомилшавии афроди ноогоҳ ба созмонҳои ифротгаро, экстремистӣ, ҳамроҳшавии ҷавонон ба ҷараёнҳои тундгаро, даст задан ба амалҳои коррупсионӣ ва гардиши ғайриқонунии маводи мухаддир доимо аҳамияти хосса медиҳанд.

        Федератсияи иттифоқҳои касабаи мустақили Тоҷикистон дар партави ҳидоятҳои Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон фаъолияти худро ба талаботи замони муосир мутобиқ сохта, барои дар амал татбиқ намудани сиёсати давлатӣ оид ба ҳифзи меҳнат, таъминоти  иҷтимоӣ ва суғурта, назорати ҷамъиятии риояи қонунгузорӣ оид ба меҳнат, иҷрои созишномаҳо ва шартномаҳои коллективӣ, таълим ва такмили ихтисоси кадрҳои иттифоқи касаба чораҳои мушаххас андешида истодааст.

        Иттифоқҳои касабаи Тоҷикистон ҳамчун ташкилоти оммавӣ рисолати хешро дар ҳифзу ҳимояи дастовардҳои Истиқлолияти давлатии Ҷумҳурии Тоҷикистон ва арзишҳои ваҳдати миллӣ, таъмини устувории сулҳу созгорӣ дар саросари кишвар, ҳифзи манфиатҳои иҷтимоиву иқтисодии аъзои  иттифоқи касаба, фароҳам овардани  шароити арзандаи зиндагӣ  барои ҳар як сокини мамлакат, инчунин тарбияи касбии  фаъолон ва мақомоти иттифоқҳои касаба медонад.

       Таъмини ҳуқуқҳои меҳнатии кормандони корхонаҳо новобаста аз шакли моликият, такмил додани қонунгузории Ҷумҳурии Тоҷикистон оид ба меҳнат, амалисозии стратегия ва барномаҳо доир ба паст намудани сатҳи камбизоатӣ, шуғли бақайдгирифтанашуда, ҳифзи манфиатҳои иҷтимоии кормандон, ташкил намудани чорабиниҳои солимгардонии иттиҳодияҳои меҳнатӣ ва аъзои оилаи онҳо, ташкил намудани истироҳати тобистонаи кӯдакону наврасони ҷумҳурӣ, қабул намудани созишномаҳои соҳавии тарифӣ ва шартномахои коллективӣ дар корхонаҳо, аз зумраи масъалаҳое ҳастанд, ки мунтазам дар меҳвари диққати Пешвои миллат қарор доранд.

         Сиёсати адолатпарваронаи Пешвои муаззами миллат бори дигар собит менамояд, ки ҳифзи манфиатҳои меҳнатии кормандон, таъсиси ҷойҳои нави корӣ, ба стандартҳои байналмилалӣ мутобиқ намудани сатҳи ҳифзи иҷтимоии кормандони ҷумҳурӣ, коҳиш ёфтани сатҳи бекорӣ, сол ба сол зиёд гаштани музди меҳнати кормандон ва рушди босуботи соҳаи иқтисодӣ- иҷтимоии аҳолӣ доимо дар сиёсати Пешвои миллат таҷассум гардида, баҳри татбиқи ин ҳадафҳо тадбирҳои судманд андешида мешаванд.           

         Иттифоқҳои касабаи Тоҷикистон ба ҳайси шарики иҷтимоӣ ҳамеша  фаъолияти Ҳукумати Ҷумҳурии Тоҷикистонро дар бахши муносибатҳои меҳнатии кормандон ҷонибдорӣ намуда, дар ҷодаи баланд бардоштани вазъи некӯаҳволии мардуми кишвар ҳамрадифи иҷроиши барномаҳои иҷтимоии давлатӣ мебошад. Дар ин самт ташкилотҳои иттифоқҳои касаба дар муассиса ва корхонаҳои ҷумҳурӣ новобаста аз шакли моликият фаъолиятро  ҷиддӣ ба роҳ мондаанд.

        Қобили зикр аст, ки дар сафи Иттифоқҳои касабаи ҷумҳурӣ 900122 (нуҳсад ҳазору яксаду бисту ду) нафар аъзоён муттаҳид гаштаанд.

        Дар дастгоҳи Федератсия ва ташкилотҳои ҳамузви он 3 Шӯрои вилоятии иттифоқҳои касаба, 17 кумитаи соҳавии иттифоқҳои касаба фаъолият доранд.

         Пешбарии номзадии Пешвои миллат муҳтарам Эмомалӣ Раҳмон ба мансаби Президенти Ҷумҳурии Тоҷикистон  гувоҳии аз ҷониби ҷомеа эътироф гардидани саҳми ин шахсият дар рушду таҳкими асосҳои соҳибихтиёрии давлати Тоҷикистон буда, аз дурустии сиёсати дурандешона, ки пайгирона ба баланд бардоштани сатҳи некӯаҳволии шаҳрвандони кишвар ва обрӯву эътибори он дар арсаи байналмилалӣ нигаронда шудааст, шаҳодат медиҳад.

       Вақте Иттифоқҳои касаба номзадии Пешвои муаззами миллат, Президенти Ҷумҳурии Тоҷикистон муҳтарам Эмомалӣ Раҳмонро ба мансаби Президенти Ҷумҳурии Тоҷикистон пешбарӣ намуданд, дар навбати аввал онҳо барои пойдории сулҳу оромӣ, таҳкими ваҳдат, худшиносӣ, худогоҳӣ, ватанпарастӣ, рушди иқтисодиёт, таъмини сатҳи зиндагии арзанда, гулгулшукуфоии кишвар, пирӯзӣ ва саодати миллати соҳибфарҳанг, кӯҳанбунёду тамадунофари тоҷик овоз медиҳанд.

        Мо вакилони Анҷумани ХХII Федератсияи иттифоқҳои касаба боварии комил дорем, ки иттифоқҳои касаба ва тамоми заҳматкашони ҷумҳурӣ имкониятҳои худро дуруст истифода бурда, аз тамоми роҳбарони ташкилот, аъзоёни иттифоқи касаба ва меҳнаткашон даъват менамоянд, ки аз ҳуқуқҳои дар қонунгузорӣ  кафолат додаашон истифода бурда, ба тарафдории номзади интихобнамудаи Иттифоқҳои касаба — Пешвои муаззами миллат, Президенти Ҷумҳурии Тоҷикистон, муҳтарам Эмомалӣ Раҳмон овоз диҳанд.

         Вакилони Анҷумани ХХII Федератсияи иттифоқҳои касабаи мустақили Тоҷикистон номзадии Пешвои муаззами миллат, Президенти Ҷумҳурии Тоҷикистон, муҳтарам Эмомалӣ Раҳмонро ба мансаби Президенти Ҷумҳурии Тоҷикистон пешбарӣ намуда, ба тамоми аъзоёни Иттифоқҳои касабаи ҷумҳурӣ муроҷиат намуда, аз онҳо даъват менамоянд, ки рӯзи 11 октябри соли 2020, ба тарафдории номзади арзанда — Пешвои муаззами миллат муҳтарам Эмомалӣ Раҳмон овоз диҳанд.

 

       Муроҷиатномаи мазкур дар Анҷумани ХХII Федератсияи иттифоқҳои касабаи мустақили Тоҷикистон 26-августи  соли 2020 аз ҷониби вакилон якдилона қабул карда шуд.