24.10.2024. Имрӯз дар шаҳри Душанбе бахшида ба Рӯзи иттифоқҳои касаба ҳамоиши тантанавӣ доир гардид.
Дар ҳамоиш роҳбарони воҳидҳои сохтории ташкилоти иттифоқҳои касабаи Точикистон, фаъолони ҳаракати иттифоқҳои касаба, собиқадорони ташкилот, намояндагони вазорату идораҳои дахлдор ва воситаҳои ахбори омма иштирок намуданд.
Дар назди ҳозирин Раиси Федератсияи иттифоқҳои касабаи мустақили Тоҷикистон сухан ронда, аз ҷумла иброз дошт, ки бо шарофати Истиқлоли давлатӣ тибқи Қонуни Ҷумҳурии Тоҷикистон «Дар бораи ворид намудани илова ба Қонуни Ҷумҳурии Тоҷикистон «Дар бораи рӯзҳои ид» аз 23декабри соли 2021 Рӯзи иттифоқҳои касаба ид кардамешавад.
Таҷлили Рӯзи иттифоқҳои касаба ба ташаббуси Пешвои миллат муҳтарам Эмомалӣ Раҳмон алоқаманд мебошад, зеро дар ҳамин рӯз- 24 октябри соли 2019 Сарвари давлат бо роҳбарону фаъолони Федератсияи иттифоқҳои касабаи мустақили Ҷумҳурии Тоҷикистон мулоқот намуда буданд. Зимни мулоқот Пешвои миллат муҳтарам Эмомалӣ Раҳмон изҳор намуданд, ки «…дар роҳи ноил шудан ба ин дастовардҳо дар баробари сохторҳои ҳокимияти давлатӣ иттифоқҳои касаба низ саҳм гузошта, онҳо ба ҳайси созмони оммавии мардумӣ масъулияти иштирок дар идоракунии
ҷомеа, тарбияи кадрҳо, ҳалли масъалаҳои мубрами ҳаёт ва таъмини адолати иҷтимоӣ, фароҳам овардани шароити мусоид барои фаъолияти кормандон дар соҳаҳои иқтисоди миллиро ба уҳда доранд ва ҷиҳати ба амал баровардани вазифа ва салоҳияти қонунии худ бояд тадбирҳои заруриро амалӣ намоянд».
Бояд гуфт, ки рисолати иттифоқҳои касаба ҳамчун ташкилоти оммавӣ ҳифзу ҳимояи дастовардҳои истиқлолияти давлатӣ, таҳкими сулҳу субот дар саросари мамлакат, ваҳдати миллӣ, ҳифзи манфиатҳои иҷтимоиву иқтисодии аъзои иттифоқи касаба ва фароҳам овардани шароити арзандаи зиндагӣ ба ҳар корманд мебошад. Дар айни замон ташкилоти иттифоқҳои касабаи Тоҷикистон фарогири 3 шӯрои вилоятӣ, 17 кумитаи соҳавӣ ва 18 ҳазору 366 ташкилоти ибтидоӣ буда, дар сафҳояш беш аз 900 ҳазор нафар аъзоро муттаҳид менамояд.
Дар солҳои истиқлолияти миллӣ қабули созишномаҳои генералӣ бори дигар собит намуд, ки ҳифзи манфиатҳои меҳнатии кормандон, таъсиси ҷойҳои нави корӣ, ба меъёрҳои байналмилалӣ мутобиқ гардонидани ҳифзи иҷтимоии кормандон, коҳиш ёфтани сатҳи бекорӣ, сол ба сол зиёд шудани музди меҳнат ва татбиқи босуботи сиёсати иҷтимоӣ пайваста дар маркази фаъолияти Ҳукумати мамлакат қарор дошта, барои амалӣ намудани ин ҳадафҳо тадбирҳои судманд андешида мешаванд.
Федератсияи иттифоқҳои касабаи мустақил ба сифати шарики боэътимоди ичтимоии Ҳукумат дар асоси Конститутсия, Кодекси меҳнат, Қонуни Ҷумҳурии Тоҷикистон «Дар бораи иттифоқҳои касаба» ва дигар санадҳои меъёрии ҳуқуқӣ дар баробари дигар ташкилоти ҷамъиятӣ дар таҳким ва рушди истиқлолияти миллӣ саҳми беандоза мегузорад.
Фаъолияти Иттифоқҳои касаба дар Тоҷикистон ба ҳайси ташкилоти ҷамъиятӣ ба санадҳои қонунгузорӣ асос ёфта, назорати ҷамъиятии риояи қонунгузории меҳнат маҳз бар дӯши ин ниҳод гузошта шудааст. Дар роҳи ноил шудан ба дастовардҳои назаррас баробари сохторҳои ҳокимияти давлатӣ иттифоқҳои касаба низ саҳм мегузоранд.
Дар ҳамоиш бахше аз собиқадорон, аз ҷумла Муродалӣ Солеҳ ва Шерхон Салимзода, фаъолони ҳаракати иттифоқҳои касаба ва роҳбарони ниҳодҳои ташкилот ба музокира баромада, андешаҳои хешро роҷеъ ба фаъолияти иттифоқҳои касаба иброз намуданд. Дар фарҷоми ҳамоиш барои кори пурсамару судманд як зумра фаъолони иттифоқҳои касаба бо сипосномаҳо сарфароз гардонида шуданд.
